သန်ရှင်းသောဝိညာဥ်တော်ဘုရား ဆင်းသက်သော ပင်တေကောစ်ပွဲနေ့ ပုပ်ရဟန်းမင်းကြီး လီယို (၁၄) ၏ ဒေသနာတော်

စိန့်ပီတာ ကျောင်းတော်ကြီး (St Peter’s Basilica) ၂၀၂၆ ခုနှစ်၊ မေလ ၂၄ ရက်၊ တနင်္ဂနွေနေ့

ချစ်လှစွာသော ဓမ္မမိတ်ဆွေ ညီအစ်ကို မောင်နှမအပေါင်းတို့ –

အီစတာပွဲတော်ကာလသည် ယနေ့ကျရောက်သော သန်ရှင်းသောဝိညာဥ်တော်ဘုရား ဆင်းသက်သော ပင်တေကောစ်ပွဲနေ့ (Pentecost) တွင် ပြည့်စုံခြင်းသို့ ရောက်ရှိပြီ ဖြစ်သည်။ ဤကယ်တင်ခြင်းဆိုင်ရာ ဖြစ်ရပ်၏ အစဉ်မပြတ် ဆက်စပ်မှုကို ပေါ်လွင်စေရန်အလို့ငှာ၊ ဧဝံဂေလိကျမ်းစာသည် ကျွန်ုပ်တို့အား “ရက်သတ္တပတ်၏ ပထမဆုံးနေ့” (ယောဟန် ၂၀:၁၉) ထံသို့ ပြန်လည်ခေါ်ဆောင်သွားပါသည်။ ထိုနေ့ သည် ရှင်ပြန်ထမြောက်တော်မူသော သခင်ယေဇူးက တပည့်တော်တို့အား “မိမိလက်နှင့် နံဘေးကိုပြ၍” ကိုယ်ထင်ရှားပြခဲ့သော နေ့သစ်ပင် ဖြစ်သည်။ သခင်ဘုရားသည် မိမိ၏ ဘုန်းအသရေနှင့် ပြည့်စုံသော ခန္ဓာတော်၊ အထူးသဖြင့် ကားတိုင်တင် ကွပ်မျက်ခြင်း၏ အမှတ်အသားများဖြစ်သော ဒဏ်ရာတော်များ ကို ထုတ်ဖော်ပြသခဲ့သည်။ နှုတ်ကပတ်တော်များထက် ပိုမိုလေးနက်ထင်ရှားလှသော ဤအသေခံတော် မူခြင်းဆိုင်ရာ အမှတ်လက္ခဏာများသည် ယခုအခါ ဘုန်းအသရေ ပြောင်းလဲသွားပြီ ဖြစ်သည်။ သေဆုံးခဲ့သော သခင်သည် ထာဝစဉ် အသက်ရှင်တော်မူ၏။

သခင်ဘုရားကို မြင်တွေ့ရသောအခါ တပည့်တော်များသည်လည်း အသက်ပြန်ရှင်လာကြသည်။ သူတို့ သည် ကြောက်ရွံ့ခြင်း လွှမ်းမိုးသဖြင့် အပေါ်ထပ်အခန်းငယ် (Upper Room) တွင် တံခါးပိတ်၍ နေခဲ့ကြသော်လည်း၊ တံခါးများ ပိတ်ထားလျက်ပင် သခင်ယေဇူးသည် သူတို့အလယ်၌ ကြွလာရပ် တန့် တော်မူပြီး သူတို့ကို ဝမ်းမြောက်ခြင်းနှင့် ပြည့်စုံစေခဲ့သည်။ ကိုယ်တော်သည် ကျွန်ုပ်တို့၏ “သေခြင်း တရား” ကို ဖြတ်သန်းလျက်၊ ကျွန်ုပ်တို့အတွက် ထွက်ပေါက်မရှိတော့သည့် အချိန်တွင် သင်္ချိုင်းဂူကို ဖွင့်လှစ်၍ ကျယ်ပြန့်စွာ ဖွင့်ပေးတော်မူခဲ့သည်။ ခရစ်တော်သည် မိမိ၏ လုပ်ဆောင်ချက်များနှင့်အတူ “သင်တို့၌ ငြိမ်သက်ခြင်းရှိစေသတည်း” ဟူသော နှုတ်ကပတ်တော်ကို မြွက်ဆိုပြီးနောက်၊ တပည့်တော် များအပေါ်သို့ သန့်ရှင်းသော ဝိညာဉ်တော်ကို မှုတ်သွင်းတော်မူခဲ့သည်။ ရှင်ပြန်ထမြောက်တော်မူသော သခင်သည် အသက်စွမ်းအားနှင့် ပြည့်စုံတော်မူ၏။ ကိုယ်တော်သည် စစ်မှန်သော လူသားတစ်ဦးအဖြစ် အသက်ပြန်ရှင်လာကြောင်း သက်သေပြပြီးနောက်၊ ကျွန်ုပ်တို့အတွက် ညီအစ်ကိုနှင့် ကယ်တင်ရှင် ဖြစ်လာတော်မူသော ခမည်းတော်၏ ချစ်သားတော်အဖြစ် ဘုရားသခင်၏ အသက်ကို အပ်နှင်းတော် မူသည်။ အသစ်သော၊ ထာဝရဖြစ်သော ပဋိညာဉ်ကို ထူထောင်တော်မူခဲ့သည့် ထိုအပေါ်ထပ် အခန်း ငယ်၌ပင် သခင်ယေဇူးသည် ဝိညာဉ်တော်ကို သွန်းလောင်းတော်မူသည်။ နောက်ဆုံးညစာစားပွဲနှင့် သစ္စာဖောက်မှု ဖြစ်ပွားခဲ့သော နေရာသည် ပြောင်းလဲသွားခဲ့ပြီ ဖြစ်သည်။ တမန်တော်တို့၏ သေတွင်း သည် အသင်းတော်တစ်ခုလုံးအတွက် ရှင်ပြန်ထမြောက်ခြင်း၏ သားအိမ် (သို့မဟုတ်) အမိဝမ်း ဖြစ်လာ ခဲ့သည်။ ထို့ကြောင့် သန်ရှင်းသောဝိညာဥ်တော်ဘုရား ဆင်းသက်သော ပင်တေကောစ်ပွဲနေ့ သည် ပါစကာ (Paschal) ပွဲတော်ဖြစ်သလို၊ ကျေးဇူးတော်အားဖြင့် ကျွန်ုပ်တို့အားလုံး ပါဝင်ဖွဲ့စည်းထားသော ခရစ်တော်၏ ခန္ဓာတော်ပွဲနေ့လည်း ဖြစ်သည်။

ဤနက်နဲသောအရာကို ဆင်ခြင်ကိုးကွယ်ရာတွင် ကျွန်ုပ်အနေဖြင့် အချက်သုံးချက်ကို အလေးပေး ပြောကြားလိုပါသည်။

ပထမဦးစွာ၊ ရှင်ပြန်ထမြောက်တော်မူသော သခင်၏ ဝိညာဉ်တော်သည် ငြိမ်သက်ခြင်း၏ ဝိညာဉ်တော် ဖြစ်သည်။ စင်စစ်အားဖြင့် ခရစ်တော်သည် မိမိ၏ ပါစကာ နက်နဲသောအရာ (Paschal Mystery) အား ဖြင့် ဘုရားသခင်နှင့် လူသားတို့အကြား ငြိမ်သက်ခြင်းကို ပြန်လည်ဆောက်တည်ပေးခဲ့ပြီး၊ သန့်ရှင်းသော ဝိညာဉ်တော်သည် ဤငြိမ်သက်ခြင်းကို ကျွန်ုပ်တို့၏ နှလုံးသားများထဲသို့ သွန်းလောင်းပေးကာ ကမ္ဘာ တစ်ဝန်းသို့ ပြန့်ပွားစေပါသည်။ ဤငြိမ်သက်ခြင်းသည် ခွင့်လွှတ်ခြင်းမှ မြစ်ဖျားခံပြီး ကျွန်ုပ်တို့အား ခွင့်လွှတ်ခြင်းဆီသို့ ပို့ဆောင်ပေးသည်။ ၎င်းသည် ကျွန်ုပ်တို့ သစ္စာဖောက်၊ ပြစ်ဒဏ်စီရင်ပြီး ကားတိုင်မှာ သံမှိုရိုက်နှက်ခဲ့သော သခင်ယေဇူးကိုယ်တိုင် ပေးသနားသည့် ခွင့်လွှတ်ခြင်းမှ စတင်သည်။

 ရှင်ပြန်ထ မြောက်တော်မူသော သခင်သည် မိမိ၏ မေတ္တာတော်ဖြင့် ကျွန်ုပ်တို့ကို အံ့ဩမှင်သက် စေလျက် “သင်တို့သည် အကြင်သူတို့၏ အပြစ်ကိုလွှတ်လျှင် ထိုအပြစ်လွတ်လိမ့်မည်” (ယောဟန် ၂၀:၂၃) ဟု ကိုယ်တိုင်မြွက်ဆိုခဲ့သည်။ ဘုရားသခင်တစ်ပါးတည်းသာ အပြစ်ကို လွှတ်ပိုင် တော်မူသော အကြောင့် (မာကု ၂:၇ ကိုကြည့်ပါ)၊ ဤနှုတ်ကပတ်တော်များဖြင့် သခင်ယေဇူးသည် ကျွန်ုပ်တို့အား ဘုရားသခင်၏ အမှုတော်၌ ပါဝင်စေခြင်း ဖြစ်သည်။ ဤအခွင့်အာဏာကို စကြဝဠာဆိုင်ရာ ပြန်လည် သင့်မြတ်ခြင်း၏ အမှတ်လက္ခဏာအဖြစ် အပ်နှင်းထားခြင်း ဖြစ်သည် – သခင်ဘုရားသည် လူသားအား လုံးကို သေခြင်းမှ ကယ်တင်ခဲ့ပြီး မည်သူ့ကိုမျှ ချန်လှပ်မထားသောကြောင့်၊ ကိုယ်တော် သည် သမိုင်း ဦးမှသည် သမိုင်းအဆုံးတိုင်အောင် မိမိ၏ ငြိမ်သက်ခြင်းဝိညာဉ်တော်ကို သွန်းလောင်း တော်မူ သည်။ စင်စစ်အားဖြင့် သန့်ရှင်းသော ဝိညာဉ်တော်သည် ရေပြင်ပေါ်၌ ဝဲပျံတော်မူသော ဖန်ဆင်းခြင်း အစဦးက တည်းက အသက်သခင်နှင့် အသက်ကို ပေးသနားတော်မူသောအရှင် ဖြစ်ပြီး (ကမ္ဘာဦး ၁:၂)၊ ယခုအခါ တွင်လည်း ဖန်ဆင်းခြင်းကို အသစ်ပြုပြင်လျက် ကမ္ဘာ့သမိုင်းကြောင်းကို ပြောင်းလဲစေတော်မူသည်။ သန်ရှင်းသောဝိညာဥ်တော်ဘုရား ဆင်းသက်သော ပင်တေကောစ်ပွဲနေ့ သည် ဘုရားသခင်နှင့် ကမ္ဘာ သူကမ္ဘာသား အပေါင်းတို့အကြား ထူထောင်သော ပဋိညာဉ်တရားသစ် (New Covenant) ၏ ပွဲတော် အဖြစ် အမှန်တကယ် ပေါ်ထွက်လာသည်။ အပေါ်ထပ်အခန်းငယ်၌ ကြားရသော အထက်မိုး ကောင်း ကင်မှ ပြင်းစွာသော လေတိုက်သံနှင့် မီးလျှာများသည် စီနာရီတောင် (Sinai) မှ ရှေးဟောင်းအမှတ် လက္ခဏာများကို သတိရစေသော်လည်း (တမန်တော် ၂:၂-၃၊ ထွက်မြောက်ရာ ၁၉:၁၆-၁၉)၊ ဘုရား သခင်၏ သန့်ရှင်းသော ပညတ်တရားတော်ကိုမူ ခရစ်တော်၏ အသားတော်နှင့် ကိုယ်တော်၏ ခန္ဓာတည်း ဟူသော အသင်းတော်အတွင်း၌ ဝိညာဉ်တော်က မေတ္တာစာလုံးများဖြင့် ကျွန်ုပ်တို့၏ နှလုံးသားတွင် ရေးထိုးထားတော်မူသည်။

ဤပညတ်တရားသည် ငြိမ်သက်ခြင်း၏ စည်းမျဉ်းဖြစ်သည် – ၎င်းသည် နှလုံးခုန်သံတိုင်း၌ ဝိညာဉ် တော်က ကျွန်ုပ်တို့အား သတိပေးနေသော နှစ်ပါးသော ချစ်ခြင်းမေတ္တာ ပညတ်တော်ဖြစ်သည်။ ထို့ ကြောင့် ကျွန်ုပ်တို့သည် မိမိတို့၏ နှလုံးသားဖြင့် “Veni Sancte Spiritus” (သန့်ရှင်းသော ဝိညာဉ် တော်ကြွလာတော်မူပါ) ဟု ဆုတောင်းနိုင်ကြသည်။ အကြောင်းမူကား ဝိညာဉ်တော်သည် ကျွန်ုပ်တို့အား ပေးသနားတော်မူပြီး ဖြစ်သောကြောင့်တည်း။ ကျွန်ုပ်တို့သည် ဝိညာဉ်တော်ကို တောင်းတနိုင်ကြသည်၊ အကြောင်းမူကား ဝိညာဉ်တော်သည် ကျွန်ုပ်တို့အား ကတိပြုထားပြီး ဖြစ်သောကြောင့်တည်း။ ကျွန်ုပ် တို့သည် ဝိညာဉ်တော်ကို ကြိုဆိုနိုင်ကြသည်၊ အကြောင်းမူကား ကိုယ်တော်ကိုယ်တိုင်က ကျွန်ုပ်တို့ ဝိညာဉ်၏ ချိုသာလှသော ဧည့်သည်တော် ဖြစ်သောကြောင့်တည်း။

ဒုတိယအချက်မှာ ရှင်ပြန်ထမြောက်တော်မူသော သခင်၏ ဝိညာဉ်တော်သည် သာသနာပြုခြင်း (Mission) ၏ ဝိညာဉ်တော် ဖြစ်သည်။ သခင်ဘုရားက “ခမည်းတော်သည် ငါ့ကိုစေလွှတ်တော်မူသကဲ့သို့ ငါသည်လည်း သင်တို့တည်းဟူသော သာသနာပြုတို့ကို စေလွှတ်၏” (ယောဟန် ၂၀:၂၁) ဟု မိန့်တော်မူခဲ့သည်။ ရလဒ်အနေဖြင့် ကျွန်ုပ်တို့သည် သခင်ယေဇူး၏ သာသနာပြုလုပ်ငန်းတော်အတွင်းသို့ ဆွဲဆောင်ခြင်း ခံရသည်။ ထိုလုပ်ငန်းတော်သည် ဘုရားသခင်ထံမှ ကြွလာပြီး ဝိညာဉ်တော်၏ တန်ခိုး အားဖြင့် ဘုရားသခင်ထံသို့ ပြန်လည်ကြွမြန်းသောအရှင်၏ လုပ်ငန်းတော်ဖြစ်သည် – ထိုဝိညာဉ် တော်သည်လည်း ခမည်းတော်နှင့် သားတော်ထံမှ ထွက်မြောက်၍၊ ၎င်းတို့နှင့်အတူ ဘုရားသခင် တစ်ပါး တည်းအဖြစ် ကိုးကွယ်ခြင်းနှင့် ဘုန်းအသရေ ချီးမွမ်းခြင်းကို ခံတော်မူသောအရှင် ဖြစ်သည်။ သန့်ရှင်း သော ဝိညာဉ်တော်သည် ကျွန်ုပ်တို့၏ သာသနာပြုလုပ်ငန်း၌ ကျွန်ုပ်တို့ကို ပြည့်စုံစေ၊ တွန်းအားပေး၊ ထောက်မပေးသော ခရစ်တော်၏ အသက်ရှင်သော မေတ္တာကရုဏာ ဖြစ်သည် (၂ ကောရိန္သု ၅:၁၄)။ တမန်တော်တို့အား တရားဒေသနာ ဟောပြောနိုင်သော တန်ခိုးကို အပ်နှင်းတော်မူစဉ် (တမန်တော် ၂:၄)၊ ထိုဝိညာဉ်တော်သည် လူသားတို့အား ကယ်တင်ခြင်း နှုတ်ကပတ်တော်ကို သွန်သင်ပေးတော်မူသည်။ ယခုအခါ တမန်တော်တို့သည် မိမိတို့အတွင်း၌ ရှင်ပြန်ထမြောက်တော်မူသောအရှင်၏ ထွက်သက် ဝင်သက်ကို ခံယူရရှိကြပြီဖြစ်ရာ၊ ဤကြေညာချက်သည် ပေတရုနှင့် သူနှင့်အတူရှိနေသူတို့၏ အသံဖြင့် တပည့်တော်တို့၏ နှုတ်ဖျားမှ လျှံထွက်လာသည်။

 ပင်တေကောစ်နေ့၌ပင် တမန်တော်တို့သည် ကားတိုင်တင်ခြင်းခံရပြီး ရှင်ပြန်ထမြောက်တော်မူသော သခင်ယေဇူးအကြောင်းကို စတင်ကြေညာ ဟောပြောခဲ့ကြသည်။ တစ်နည်းအားဖြင့်ဆိုရသော် “ဘုရားသခင်၏ ကြီးမြတ်လှသော အမှုတော်များ” (တမန်တော် ၂:၁၁) သည် ယုံကြည်ခြင်းမှ စတင်သော ရွေးနုတ်ကယ်တင်ခြင်း၌ ပေါင်းစုံသွားခြင်း ဖြစ်သည်။ စင်စစ်အားဖြင့် ကျွန်ုပ်တို့အတွင်း၌ သန့်ရှင်းသော ဝိညာဉ်တော်၏ ပထမဆုံးသော အမှုတော်မှာ “ယေဇူးသည် သခင်ဖြစ်တော်မူ၏” (၁ ကောရိန္သု ၁၂:၃) ဟု ကျွန်ုပ်တို့ ဝန်ခံသော ယုံကြည်ခြင်းပင် ဖြစ်သည်။

 ဤယုံကြည်ခြင်းသည် ကောင်းမှုကုသိုလ်တိုင်း၊ ကရုဏာအမှုတိုင်းနှင့် သီလတရားတိုင်း၌ အသက်ရှင် လျက် ထင်ရှားပေါ်လွင်နေပါသည်။ ထို့ကြောင့် ကမ္ဘာ့အရပ်ရပ်မှ ယနေ့ ဤနေရာသို့ လာရောက်ကြပြီး၊ သခင်ဘုရား၏ စားပွဲတော်သို့ ဖိတ်ကြားခံရကာ၊ နှုတ်ကပတ်တော်ကို နာယူရန် စုဝေးလျက်၊ ၎င်းကို နေရာတိုင်း၌ သက်သေခံရန် ခေါ်ယူခြင်းခံရသော ကျွန်ုပ်တို့တစ်ဦးစီတိုင်းသည် ဘုရားသခင်၏ အမှုတော်ဆောင်များ ဖြစ်ကြသည်။

ချစ်လှစွာသော မိတ်ဆွေတို့၊ ကျွန်ုပ်တို့သည် သတင်းကောင်း ၏ လုပ်ဖော်ကိုင်ဖက်များ အမှန်ပင် ဖြစ်ကြသည် – အသင်းတော်တစ်ခုလုံးသည် ဤသတင်းကောင်းကို စောင့်ရှောက်သူမျှသာ မဟုတ်ဘဲ၊ ယင်း၏ အဓိက ဦးဆောင်မောင်းနှင်သူ (Protagonist) ဖြစ်သည်။ ဝိညာဉ်တော်၏ တန်ခိုးတော်အားဖြင့် ကျွန်ုပ်တို့၏ ကြေညာဟောပြောမှုသည် ဝမ်းမြောက်ခြင်းနှင့် မျှော်လင့်ခြင်းတို့ဖြင့် ပြည့်နှက်နေသည်၊ အကြောင်းမူကား ကျွန်ုပ်တို့ — ဟုတ်ပါသည်၊ ကျွန်ုပ်တို့ကိုယ်တိုင်က — ကမ္ဘာကြီး၏ အသစ်စက်စက် အရာများ၊ မြေကြီး၏ ဆားနှင့် လောက၏ အလင်း ဖြစ်သောကြောင့် ဖြစ်သည် (မဿဲ ၅:၁၃-၁၄)။

ဤသည်မှာ ကျွန်ုပ်တို့၏ ကိုယ်ပိုင်အရည်အချင်း သို့မဟုတ် အထူးအခွင့်အရေးကြောင့် အမှန်ပင်မဟုတ် ဘဲ၊ အပြစ်သားကို သန့်ရှင်းစေတော်မူသော၊ နူနာစွဲသူကို အနာငြိမ်းစေတော်မူသော၊ မိမိကို ငြင်းပယ်ခဲ့ သူအား တမန်တော်တစ်ဦးအဖြစ် ပြောင်းလဲပေးတော်မူသော သခင်ဘုရား၏ နှုတ်ကပတ်တော်ကြောင့် ဖြစ်သည်။ ကျွန်ုပ်တို့ ရှင်းလင်းစွာ မြင်တွေ့နိုင်သည့်အတိုင်း၊ လောကသို့ အသက်သစ်ကို မဆောင်ကျဉ်း ပေးနိုင်ဘဲ လွဲမှားမှုနှင့် အကြမ်းဖက်မှုများကြောင့် လောကကြီးကို အိုမင်းရင့်ရော်စေသည့် အပြောင်း အလဲများ ရှိနေပါသည်။ သို့သော်လည်း သန့်ရှင်းသော ဝိညာဉ်တော်သည် စိတ်အလင်းကို ပွင့်စေပြီး ကျွန်ုပ်တို့၏ နှလုံးသားထဲသို့ သစ်လွင်သော သက်စောင့်အားကို သွန်းလောင်းပေးသည်။

 ဤနည်း အား ဖြင့် ကိုယ်တော်သည် သမိုင်းကြောင်းကို ဘုန်းအသရေ ပြောင်းလဲစေကာ၊ သခင်ဘုရားက လူတိုင်းအား ပေးကမ်းသော ကယ်တင်ခြင်းကျေးဇူးတော်ဆီသို့ သမိုင်းကို ဖွင့်လှစ်ပေးတော်မူသည်။ အသင်းတော်၏ သာသနာပြုလုပ်ငန်းသည် ဤပေးကမ်းမှုကို သက်သေခံနေခြင်းဖြစ်ပြီး၊ ထိုမှတစ်ဆင့် လောက၏ ရှုပ်ထွေးမှုများကို ဘုရားသခင်နှင့်လည်းကောင်း၊ ကျွန်ုပ်တို့အချင်းချင်းနှင့်လည်းကောင်း တစ်လုံးတစ်ဝတည်း ဖြစ်ခြင်း (Communion) ဆီသို့ ပြောင်းလဲပေးသည်။

ဤသာသနာပြုလုပ်ငန်းသည် ဘုရားသခင်နှင့် လူသားတို့အကြောင်း အမှန်တရားကို ကြေညာခြင်းဖြင့် စတင်သည်၊ အကြောင်းမူကား ရှင်ပြန်ထမြောက်တော်မူသော သခင်၏ ဝိညာဉ်တော်သည် သခင် ဘုရားကိုယ်တိုင် ကျွန်ုပ်တို့အား ကတိပေးတော်မူခဲ့သည့် “သမ္မာတရား၏ ဝိညာဉ်တော်” (ယောဟန် ၁၄:၁၇) ဖြစ်ပြီး၊ ကျွန်ုပ်တို့၏ ချစ်ခြင်းမေတ္တာ၏ မြစ်ဖျားခံရာဖြစ်သော ဘုရားသခင်၏ မေတ္တာတော် ပေါ်တွင် အခြေခံသည့် အသင်းတော်၏ စည်းလုံးခြင်းကို တောင်းဆိုထားသောကြောင့် ဖြစ်သည်။ ပရောဖက်တို့အားဖြင့် မိန့်တော်မူခဲ့သော ဝိညာဉ်တော်သည် သမ္မာတရား၌ စည်းလုံးခြင်းကို အစဉ်မြှင့် တင်ပေးသည်၊ အကြောင်းမူကား ကိုယ်တော်သည် ကျွန်ုပ်တို့အား နားလည်သဘောပေါက်ခြင်း၊ သဟဇာတဖြစ်ခြင်းနှင့် အသက်တာ၏ တညီတညွတ်တည်း ရှိခြင်းတို့ကို သွန်းလောင်းပေးသောကြောင့် ဖြစ်သည်။ စိန့်ဩဂတ်စတင်း (Saint Augustine) သွန်သင်ခဲ့သကဲ့သို့ “သန့်ရှင်းသော ဝိညာဉ်တော်သည် ဤအရာကို မိမိရှိနေခြင်း၏ အမှတ်လက္ခဏာ ဖြစ်စေလိုတော်မူသည်” (ဒေသနာ ၂၆၉, ၁) – ၎င်းမှာ တူညီသော ယုံကြည်ခြင်းတစ်ခုတည်းအတွင်း နားလည်နိုင်သော ဘာသာစကားအမျိုးမျိုး (Tongues) ၏ ဆုကျေးဇူး ဖြစ်သည်။ ဥပက္ခာပြုခြင်း၊ အကျိုးဆောင်အုပ်စုဖွဲ့ခြင်း၊ ဟန်ဆောင်မှုများနှင့် သတင်းကောင်း ၏ အလင်းကို ကွယ်ပျောက်စေသော ခေတ်ရေစီးကြောင်းများ အပါအဝင်၊ ဤနား လည်မှုကို ဟန့်တား နှောင့်ယှက်သမျှ အရာအားလုံးမှ ကျွန်ုပ်တို့ကို နှစ်သိမ့်ပေးသူ (Paraclete) က ကာကွယ်ပေးတော်မူသည်။ ဘုရားသခင်က ကျွန်ုပ်တို့အား ပေးသနားတော်မူသော အမှန်တရားသည် လူမျိုးတကာတို့အတွက် လွတ်မြောက်ခြင်းနှုတ်ကပတ်တော် ဖြစ်ပြီး၊ ယဉ်ကျေးမှုတိုင်းကို အတွင်းပိုင်းမှနေ၍ ပြောင်းလဲစေသော သတင်းစကား ဖြစ်သည်။

စင်စစ်အားဖြင့်၊ ရှင်ပြန်ထမြောက်တော်မူသော သခင်၏ ဝိညာဉ်တော်သည် တစ်ကြိမ်တစ်ခါတည်း သွန်း လောင်းခြင်း မဟုတ်ဘဲ၊ အစဉ်မပြတ် သွန်းလောင်းနေခြင်း ဖြစ်သည်။ (Eucharist – ကိုယ်တော်မြတ် စားပွဲတော်) သည် ကျွန်ုပ်တို့ကို မပြတ်မကွက် မွေးမြူထောက်ပံ့နေသော ခရစ်တော်၏ အသက်ရှင်သော တည်ရှိမှု ဖြစ်သကဲ့သို့ပင်၊ သန့်ရှင်းသော ဝိညာဉ်တော်သည်လည်း ကျွန်ုပ်တို့အား ခရစ်ယာန်များ ဖြစ်စေသည့် ဆေးကြောခြင်းမင်္ဂလာ (Baptism) ၌လည်းကောင်း၊ ကျွန်ုပ်တို့အား သက်သေခံများအဖြစ် ခိုင်မြဲစေသည့် ခိုင်ခံ့ခြင်းမင်္ဂလာ (Confirmation) ၌လည်းကောင်း၊ ဘုရားသခင်၏ လူမျိုးတော်အတွက် ဓမ္မအမှုတော်ဆောင်များနှင့် သိုးထိန်းများကို ခန့်အပ်ပေးသည့် သိက္ခာထပ်ခြင်းမင်္ဂလာ (Holy Orders) ၌လည်းကောင်း ကိုယ်တော်၏ အမှတ်လက္ခဏာကို ကျွန်ုပ်တို့အပေါ် ရိုက်နှိပ်ပေးတော်မူသည်။

စက္ကရမင်တူ မင်္ဂလာ (Sacrament) တိုင်း၌ ကိုယ်တော်သည် ဆုကျေးဇူးများကို ပေးသနား တော်မူ သောအရှင် (dator munerum) ဖြစ်ပြီး၊ ဆုတောင်းခြင်း၊ ကရုဏာအမှုများနှင့် ဘုရားသခင်၏ နှုတ်ကပတ် တော်ကို လေ့လာခြင်းတို့မှတစ်ဆင့် ဆုကျေးဇူးများနှင့် ဝိညာဉ်ဆုများကို တိုးပွားစေသော သန့်ရှင်းခြင်း ၏ မြစ်ဖျားခံရာ ဖြစ်သည်။ တမန်တော် သွန်သင်ခဲ့သကဲ့သို့ – “အများအကျိုးကို ဆောင်စိမ့်သောငှာ၊ လူအသီးသီးတို့အား ဝိညာဉ်တော်၏ ထင်ရှားခြင်းကို ပေးတော်မူ၏” (၁ ကောရိန္သု ၁၂:၇)။ ဤအကြောင်း ရင်းကြောင့်ပင် ကျွန်ုပ်တို့သည် ဘုရားသခင်၌ အသက်ရှင်လျက် လောကကြီးကို အစေခံသော ခန္ဓာ တစ်ခုတည်းတည်းဟူသော အသင်းတော် ဖြစ်ကြသည်။ ဝိညာဉ်တော်ကြောင့် ကျွန်ုပ်တို့သည် လူသား အားလုံးထံသို့ စစ်မှန်သော ငြိမ်သက်ခြင်းနှင့် ကယ်တင်ခြင်းကို ပေးစွမ်းသော အမှန်တရား တည်းဟူ သော ကျွန်ုပ်တို့၏အရှင် ခရစ်တော်ဘုရားကို ဆောင်ကျဉ်းပေးနိုင်ကြသည်။

ချစ်လှစွာသော မိတ်ဆွေတို့၊ ရှင်ပြန်ထမြောက်တော်မူသော သခင်၏ ဝိညာဉ်တော်သည် ကျွန်ုပ်တို့အား စစ်မက်ဘေးဆိုးမှ ကယ်တင်တော်မူရန် ယနေ့တွင် ထက်သန်သော နှလုံးသားဖြင့် ဆုတောင်းကြပါစို့။ ထိုစစ်ပွဲကို အင်အားကြီးနိုင်ငံတစ်ခုက မဟုတ်ဘဲ၊ ချစ်ခြင်းမေတ္တာ၏ အနန္တတန်ခိုးတော်ဖြင့်သာ အောင် နိုင်ခြင်း ဖြစ်သည်။ ဝိညာဉ်တော်သည် လူသားတို့ကို ဆင်းရဲဒုက္ခမှ ကယ်လွှတ်တော်မူရန် ဆုတောင်း ကြပါစို့၊ ထိုဆင်းရဲခြင်းကို တိုင်းတာ၍မရသော စည်းစိမ်ဥစ္စာဖြင့် မဟုတ်ဘဲ၊ ကုန်ခမ်းသွားခြင်းမရှိသော ကျေးဇူးတော်ဖြင့်သာ ရွေးနုတ်နိုင်ခြင်း ဖြစ်သည်။ သခင်ယေဇူး၏ နာမတော်၌ လူမျိုးတကာတို့အား ကြေညာထားသော ကယ်တင်ခြင်းတရားအားဖြင့် အပြစ်တရားတည်းဟူသော ဘေးဒဏ်မှ ကျွန်ုပ်တို့ကို အနာငြိမ်းစေတော်မူရန် ဆုတောင်းကြပါစို့။ ဤသည်မှာ တမန်တော်တို့အား ရဲစွမ်းသတ္တိကို သွန်း လောင်းပေးခဲ့သော ကျေးဇူးတော် ဖြစ်ပါသည် – အသင်းတော်၏ မယ်တော် မာရိယာ၏ ကြားဝင်ဆု တောင်းပေးမှုအားဖြင့်၊ ကိုယ်တော်သည် ကျွန်ုပ်တို့အားလည်း ယနေ့နှင့် အစဉ်အမြဲ ထိုနည်းတူ ရဲစွမ်းသတ္တိကို သွန်းလောင်းပေးပါစေသတည်း။

Fr. Peter Kyi Maung

Photo Credit: Vatican News

Original Link: https://www.vatican.va/content/leo-xiv/en/homilies/2026/documents/20260524-pentecoste.html