နီကောလား စန်တာခလောစ် (Santa Claus)!

ဒီဇင်ဘာ (၆)ရက်

ရောမအင်ပါယာကြီး လျှမ်းလျှမ်းတောက်ကျော်ကြားစဉ်က……

ခရစ်တော်ပေါ်ပြီး(၂-၄)ရာစု အချိန်ဖြစ်၏။

ဆရာတော်ကြီးနှင့် ငါးဖမ်းရာမှ ပြန်လာသော ကောင်လေးတစ်ယောက်တို့ စကားပြောနေကြ၏။

“နီကောလား..မင်း..ကြီးလာရင် လူကိုဖမ်းတဲ့တံငါလုပ်ပါ”

“ဘာကိုပြောတာလဲ ဆရာတော်ဘုရား..”

“ခရစ်တော်က သူ့တပည့်တော်ကြီးတွေကို မှာခဲ့တာလေ….ဧဝံဂေလိသတင်းကောင်းဟောဖို့၊ လူကိုဖမ်းတဲ့တံငါလုပ်ဖို့လေ…”

ကောင်လေးက ခေါင်းတစ်ချက်ကုပ်ကာစဉ်းစားလိုက်ပြီး…

“ဟုတ်ကဲ့…ကျွန်တော်ကြိုးစားပါ့မယ်..အခုတော့ ဒီငါးလေးကို ကိုယ်တော် ညစာအဖြစ် ကင်စားပါနော်..”

ဆရာတော်ကြီးက ကြင်နာတက်သည့် ကောင်လေးကြောင့် သဘောကျစွာ ပြုံးလိုက်၏။

“အဖေ..ကျွန်တော့်ကို လက်ဆောင်ပေးမလို့ဆို..ဘာလဲဟင်”

“နီကောလား..ဒီမြင်းလေးကို ဖေဖေက မင်းကိုအပိုင်ပေးတာ…”

“ဟာ..တကယ်လားဖေဖေ…ပျော်လိုက်တာ….”

နီကောလားသည်ချမ်းသာသည့် အသိုင်းအဝိုင်းမှ တစ်ဦးတည်းသော သားဖြစ်၏။…

ခရစ်ယာန်ဘာသာ တရားအဆုံးအမအောက်၌ ကြီးပြင်းကာ အလွန်ကြင်နာတတ် လေသည်။

တစ်နေ့..ဈေးနားတစ်နေရာ၌ လူအများ ရုတ်ရုတ်သဲသဲဖြစ်နေကြ၏။

ချမ်းသာသည့် ရောမသစ္စာခံ သူဠေးကြီးတစ်ဦးသည် ကလေးငယ် တစ်ဦးကို ကြိုးတုတ်ကာ လူပုံအလယ်. ဟစ်အော်နေ၏။

“ဒီမှာ…ဒီကောင်လေးက ကျုပ်ပိုင်တဲ့ ကျွန်လေးပါ…ဘယ်သူ ဝယ်ချင်ပါသလဲ…”

လူအုပ်ကြီးထဲမှ မြင်းလေးတစ်ကောင်ကို ဆွဲလာသောကောင်လေး ထွက်လာ၏။

“ကျွန်တော်ယူမယ်”

“ဘာကွ…မင်းက ကလေးဘဲရှိသေးတာ..ဘယ်ကပိုက်ဆံရတာလဲ”

“ရွှေဒင်္ဂါးသုံးပြားဗျာ…”

“ကဲ.. လူကြီးမင်းတို့ ဒီကောင်လေးက ရွှေဒင်္ဂါးသုံးပြားပေးတယ်…ဘယ်သူပိုပေးမလဲ”

“ခြောက်ပြား..”

လူတစ်ယောက်က ထအော်သည်။

“ကောင်လေး..မင်းရှုံးတယ်..ဟိုက ငါ့ကိုဒင်္ဂါးခြောက်ပြားပေးနေတယ်”

“ကျုပ်ကဒင်္ဂါးသုံးပြားအပြင်၊ ကျုပ်ရဲ့ ဟောဒီမြင်းကိုပါ ပေးဝယ်တယ်ဗျာ..ကဲ..ဒီကောင်လေးကို ကျုပ်ပိုင်ပြီး…”

ကျွန်ကောင်လေး အနားသို့ ကပ်ကာကြိုးဖြေပေးနေ၏။

“သခင်…အခု သခင်က ကျွန်တော့်ကို ပိုင်ပါတယ်…ခိုင်းစရာရှိတာခိုင်းပါ…”

“ငါတို့ ခရစ်ယာန်တွေက ကျွန်တွေ၊ သခင်တွေ မခွဲဘူးကွ..မင်းနဲ့ငါက ရွယ်တူဘဲ..ကဲ..အခု သူငယ်ချင်းဖြစ်သွားပြီး..”

သာယာသော ညနေခင်းလေးတစ်ခု။

မိန်းမပျို တစ်ဦးနှင့် လူဝကြီးတစ်ဦးတို့ ရုန်းရင်ဆန်ခတ်ဖြစ်နေ၏။

“ရှင်…မယုတ်မာနဲ့နော်…လမ်းလယ်ခေါင်မှာ…”

“ဟေ့…မင်းအဖေက ငါ့ဆီမှာအကြွေးတွေချည်းဘဲ…အခုငါမင်းကို သိမ်းလို့ ရတယ်ကွ..”

ထိုစဉ် မိန်းမပျို၏ ဖခင်ရောက်လာရာ..

“ဒီမှာ မနက်ဖြန် မင်းငါ့အကြွေးမဆပ်နိုင်ရင် မင်းသမီးသုံးယောက်ကိုငါ အပိုင်သိမ်းမယ်ကွ…”

ထိုညအဖို့ သူဆင်းရဲ သားအဖတို့ အိပ်မပျော်ကြတော့ပေ။

ထိုအချင်းအရာကို မြင်သော နီကောလားသည် ညဘက် တိတ်တဆိတ်လာကာ အိမ်ခေါင်မိုး အပေါ်တက်ပြီး မီးခိုးခေါင်းတိုင်ထဲသို ရွှေဒင်္ဂါးအိတ်ကိုပစ်ထည့်ပေးခဲ့လေသည်။

သူသည် ဖခင်ချန်ခဲ့သော ဥစ္စာများကို ဆင်းရဲသားများသို့ တိတ်တဆိတ် ပေးကမ်းနေ၏။

အထူးသဖြင့် ဆင်းရဲသားအိမ်များသို့ ညဘက်များ၌ သွားကာ ရွှေဒင်္ဂါးများကို ပြတင်းပေါက်များမှ တဆင့် ပစ်ထည့်ပေး ခဲ့လေသည်။

တစ်နေ့..

မိမိပိုင်ဆိုင်သမျှကို အိတ်ထဲထည့်ကာ..ဆရာတော်ကြီးထံသွားလှူပစ်ခဲ့လေသည်။

ထိုခေတ်အခါက ခရစ်ယာန်အများစုမှာ ဆင်းရဲသားများ၊ ကျွန်များဖြစ်ကာ…

နီကောလား၏ စည်းစိမ်တို့က အသင်းတော်အတွက်များစွာ အထောက်အကူဖြစ်လေ၏။

“နီကောလား…မင်းကို တိုင်ပင်စရာ ရှိတယ်…”

“ပြောပါ…အရှင်ဘုရား..”

“အခြားပြည်နယ်က ဆရာတော်တွေနဲ့လည်း တိုင်ပင်ပြီးပြီး…ငါမရှိတော့ရင် ဒီအသင်းတော်ကို မင်းဦးဆောင်ပါ”

“ဘယ်လို….ကျွန်တော်က ဘုန်းကြီးတောင် မဟုတ်တာ…ဘယ်လိုလုပ်ပြီး ဆရာတော် ဖြစ်ရမှာလဲ”

“ဘုရားသခင်က ဒီလိုအလိုရှိတယ်”

ဆရာတော် နီကောလားကို လူကြီး၊ ကလေး လူတိုင်းက ချစ်ကြ၏။

“လမ်းဖယ်ကြဟေ့….ဆရာတော်ကြီးလာတယ်…”

“မင်းတို့ကို ပျော်ရွှင်ခြင်းရဲ့လျို့ဝှက်ချက်ကိုပြောမလို့..”

“ပြောပါဆရာတော်နီကောလား..”

“ခရစ်တော်ရဲ့တရားတော်ထဲမှာလည်းပါတယ်…ဆင်းရဲသားတွေကို ပေးကမ်းစွန့်ကြဲဖို့…

မှတ်ထားကြ။ မင်းတို့ဘဝမှာ ပေးကမ်းစွန့်ကြလေလေ…ပျော်ရွှင်ရလေလေဘဲ….”

ဆီဇာဘုရင်အမိန့်ဖြင့် ခရစ်ယာန်တို့ကို ဖမ်းဆီးကြပြီး ဘုရားကျောင်းတို့ကို မီးရှို့ ဖျက်ဆီးကြလေ၏။

ဆရာတော် နီကောလားကို ဖမ်းကာ ထောင်ချထားလေသည်။ နှစ်ပေါင်းများစွာ ထောင်ထဲနေရ၏။

ဘုရင်ကွန်စတင် နန်းတက်သောအခါမှ ခရစ်ယာန် တို့ လွတ်ငြိမ်း ချမ်းသာခွင့်ရကာ ဆရာတော်နီကောလားလည်းပြန်လွတ်လာ၏။

“Christmas ”ရာသီ…

“ဆရာတော်နီကောလား ထောင်ကနေ လွတ်လာပြီးဟေ့…”

ခရစ္စမတ်ရာသီ၌

ထိုသတင်းက ဟိုးလေးတကျော်…

ယခင်က ခရစ်ယာန်တို့ကို လိုက်လံနှိပ်စက်သည့်သူပင် အကျင့်ပြောင်းလဲကာ ခရစ်ယာန်ဖြစ်သွားချေပြီး……

ဆရာတော်နီကောလားလည်း..အသင်းတော်ကို ပြန်လည်ဦးဆောင်ခဲ့လေသည်။

သို့သော်.. ငယ်ဘဝမှ လုပ်ခဲ့သည့်အတိုင်း ညတိုင်းလမ်းတကာလှည့်ကာ အထုတ်တစ်ထုတ်ဖြင့် ကစားစရာ အရုပ်များ၊ စားစရာများ၊ အဝတ်အထည်များကို ယူဆောင်ကာ ဆင်းရဲသားတို့၏ အိမ်ပြတင်းပေါက်များ၌ သွားရောက်ထားခဲ့လေ့ရှိသည်။

လူအများကလည်း..ထိုလျို့ဝှက်လက်ဆောင်များကို မိမိတို့ အိပ်ခန်းများ၊ ပြတင်းပေါက်များ၌တွေ့ပါက ဆရာတော်နီကောလား ပို့လိုက်ပြီဟု အတပ်သိနေကြ၏။

ထူးဆန်းသည်မှာ ဆရာတော်သည် အလွန် အကူအညီလိုအပ်နေသော ဆင်းရဲသား မိသားစုများကို စိတ်အာရုံထဲ၌ အလိုလိုသိနေခြင်းပင်။……..

# မှတ်ချက်

သူ၏ပွဲနေ့ကို ဒီဇင်ဘာ (၆)ရက်နေ့တွင် ကျင်းပပြီး

ကလေးသူငယ်များ၊ ပင်လယ်ခရီးသွားသမားများကို စောင့်ရှောက်သည့် ရဟန္တာ ဖြစ်သည့်အပြင် ကပ်ရောဂါများပျောက်ရန် အထူးအားကိုး ဆုတောင်းကြသည်။

Source:

I Santi di tutto l’anno မှ Nicola ကိုဘာသာပြန်သည်။

ကိုးကားသာအုပ်အဖြစ် Santi e Patroni d’Europaမှ S. Nicola.

Credit: Nwe Nwe Nandar

Photo credit Google